काठमाडौं– नेपाली कांग्रेसका नेता प्रकाशमान सिंहले जेन-जी आन्दोलनमा घुसपैठ गरी ऐतिहासिक धरोहरमा आगजनी गर्ने काम भएको बताएका छन् ।

बिहीबार जेन-जी आन्दोलनमा क्रममा आगजनी र तोडफोड भएको काठमाडौंको चाक्सीबारीस्थीति आफ्नै घरको निरीक्षण गर्दै नेता सिंहले इतिहासमा सम्मान गरिने गणेशमानको घर, बिपी कोइरालाको निवास, कृष्णप्रसाद भट्टराई आश्रम लगायतका ऐतिहासिक धरोहरमा आगजनी गर्नेहरू जेन-जी आन्दोलनकारी नभई आन्दोलनका नाममा घुसपैठ गर्नेहरू भएको बताएका हुन् ।

उनले उक्त घटनाको विधि अनुसार छानबिन हुनुपर्ने माग गरे । सिंहले देशव्यापी रूपमा नियोजित रूपमा भएको आगजनीको घटनाले राष्ट्रलाई नै ठूलो क्षति पुगेको धारणा राखे ।

मुलुकको परिवर्तनमा महत्त्वपूर्ण भूमिका खेल्नेहरूमाथि नियोजित रूपमा आक्रमण गर्ने दुस्साहस नगर्न चेतावनी दिँदै उनले सबै मिलेर देश निर्माण गर्नुपर्नेमा जोड दिए ।

उनले अहिलेको समयमा जनताको माग बमोजिम नेताहरूले आफ्नो पार्टीलाई अघि बढाउन जरुरी रहेको बताए । 

जेन-जी आन्दोलनका क्रममा सिंहको ठमेल चाक्सीबारीस्थित घरमा प्रदर्शनकारीले आगजनी गरेर निवास र केही गाडीहरू जलाइएको थियो । 

ठमेलको चाक्सीबारीस्थित निवास गणेशमान सिंहले बनाएका हुन् । आफ्ना बुवाले बनाएको सोही घर मर्मत गरी प्रकाशमान सिंह सोही घरमा नै बस्दै आएका थिए ।