कुश्मा- पर्वतको कुश्मा र बागलुङको बलेवा जोड्ने कालीगण्डकीमाथि निर्मित एशियाकै नमुना ‘दि क्लिफ’ पुल बागलुङ नगरपालिकाका नागरिकलाई एक महिनासम्म निःशुल्क खुला गरिएको छ। परिचयपत्रका आधारमा उक्त पुलमा नि:शुल्क हिँड्न सकिने कम्पनीले जनाएको छ।

लगातारको भारी वर्षाका कारण बागलुङका विभिन्न स्थानमा पहिरो जाँदा सडक अवरुद्ध भई यातायात अवरोध भएपछि द क्लिफले स्थानीयलाई राहतस्वरूप यो विशेष सुविधा दिने भएको हो।

सडक अवरुद्ध हुँदा स्थानीयको दैनिक जीवनमा प्रत्यक्ष असर पुगेको अवस्थालाई मध्यनजर गर्दै पुलबाट आवतजावत सहज होस् भनेर यो योजना ल्याइएको द क्लिफका अध्यक्ष राजु कार्कीले बताए ।

विपद्को समयमा सहज आवतजावतका लागि गरिएको यो व्यवस्था स्थानीयलाई ठूलो राहत हुने अपेक्षा गरिएको छ।

लामो समयदेखि यो पुल, बागलुङका कृषि उत्पादन कुश्मा बजारसम्म पुर्‍याउने पुल बन्दै आएको छ ।

विद्यार्थीहरूलाई पढ्न जान, कर्मचारीलाई जागिरमा पुग्न, बजार आवतजावत र सामान्य दैनिकीलाई सस्तो र छिटो बनाएको छ। नियमित प्रयोगकर्ताका लागि मासिक पासको सुविधा छ।

५२० मिटर लम्बाइ र २२८ मिटर उचाइको यो पुलले कुश्मा–बलेवा मात्र नभई, सम्पूर्ण क्षेत्रको आर्थिक, सामाजिक र सांस्कृतिक आवतजावतलाई जोड्ने महत्त्वपूर्ण आधार बनेको छ।