काठमाडौं– नेपाली कांग्रेसका उपसभापति धनराज गुरुङले राजनीतिमा स्वच्छ प्रतिस्पर्धा हुन नसक्दा लोकतन्त्र÷गणतन्त्र धरापमा पर्दै गएको बताएका छन् ।  

सोमबार कास्कीमा नेपाल लोकतान्त्रिक खेलकुद संघको गण्डकी प्रदेश समितिको प्रथम प्रदेश अधिवेशन उद्घाटन गर्दै गुरुङले नेपाली राजनीतिमा अनुशासन हराउँदै गएको र स्वच्छ प्रतिस्पर्धा हुन नसक्दा लोकतन्त्र/गणतन्त्र धरापमा पर्दै गएको बताएका हुन् ।

एक नेताले अर्को नेतालाई एक पार्टीले अर्को पार्टीलाई खुइल्याउने प्रवृत्ति बढेको भन्दै यस्तो अनुशासनहीन लोकतन्त्र/गणतन्त्र हुन नसक्ने उनको भनाइ थियो ।

उनले राष्ट्रियताको सवालमा पार्टी, जाति, भेग, समुदाय कुनै वाहनमा विभाजन हुन नहुने भन्दै नेपालमा समाजवाद अझै आउन नसकेको बताए ।

गुरुङले लोकतन्त्र, गणतन्त्रलाई अप्ठ्यारो पर्दा मात्रै पार्टीको निर्देशन मान्नुपर्ने बताउँदै खेल क्षेत्रको विकासको लागि पार्टीको निर्देशन कुरेर बस्नु नपर्ने बताए । 

त्यस्तै कांग्रेस नेता मोहन बहादुर बस्नेतले पार्टीको भातृसंस्था बलियो भए पार्टी बलियो हुने बताए  । देशभरमा रहेका कांग्रेसका नेताहरू देश हाँक्न सक्षम रहेको भन्दै उनले कांग्रेसको शक्तिलाई मुलुकको विकासमा परिचालन गर्नुपर्नेमा जोड दिए  । 

बस्नेतले लोकतान्त्रिक खेलकुद संघले खेल र खेलाडीको विकासमा विशेष ध्यान दिनुपर्ने धारणा राखे  ।