काठमाडौं- प्रमुख सत्तारूढ नेकपा (एमाले)को पोलिटब्युरो बैठक केन्द्रीय कार्यालय च्यासलमा बसिरहेको छ ।

बैठक पार्टी केन्द्रीय कार्यालय च्यासलमा दिउँसो १ बजेदेखि सुरू भएको हो । यसअघि बैठक ११ बजे बस्ने तयारी थियो ।

यो बैठकले बिहीबार मध्यरातिसम्म बसेको सचिवालय बैठकका निर्णयहरूमाथि छलफल र अनुमोदन गर्ने तयारी छ ।

सचिवालय बैठकले पदाधिकारीको संख्या १९ बाट घटाएर १५ जना बनाउने प्रस्ताव पारित गरेको छ । ७० वर्षे उमेरहद र दुई कार्यकालको व्यवस्था पनि हटाएको छ। बैठकले सचिवालयको अवधारणा हटाएर १५ जना पदाधिकारीलाई स्थायी कमिटीमा परिणत गरेको छ ।

एमालेले ११ औँ महाधिवेशनदेखि केन्द्रीय निकायका रूपमा तीनवटा कमिटी मात्र सक्रिय हुने गरी विधान महाधिवेशनमा प्रस्ताव लाने भएको छ । एमालेले वरिष्ठ उपाध्यक्ष पद पनि हटाउने प्रस्ताव अघि बढाइसकेको छ।