काठमाडौं- अनेरास्ववियुको २४ औँ महाधिवेशनमा अध्यक्ष पदका उम्मेदवार प्रकाश पौडेलले पछिल्लो समय नेकपा एमालेभित्र देखिएको संकटबारे गम्भीर टिप्पणी गरेका छन् ।

उनले पार्टीभित्र ‘आधिकारिक’ र ‘अनधिकृत’ भन्ने विभाजन सिर्जना गरिँदा समग्र संगठन कमजोर बन्दै गएको पनि बताएका छन् ।

पौडेलले सामाजिक सञ्जालमार्फत् पार्टी नेतृत्वप्रति कटाक्ष गर्दै लेखेका छन्, ‘आजभोलि हाम्रो पार्टीका नेताहरूले सार्वजनिक मञ्चमा बोलेको सुन्छु—पहिले सिट्ठी फुक्दा हजारौँ कार्यकर्ता भेला हुन्थे, तर आजभोलि त्यस्तो हुँदैन।’

उनले यदि यही प्रवृत्ति कायमै रहे भविष्यमा पार्टी संकटमा पर्दा कार्यकर्ताहरूले समर्थन गर्न नसक्ने अवस्था आउन सक्ने चेतावनी दिएका छन्।

‘अझै पनि यस्तै रवैया कायम राख्दै, आफ्नै कार्यकर्तालाई ‘आधिकारिक’ र ‘अनधिकृत’ भन्दै विभाजन गर्ने र स्वच्छ प्रतिस्पर्धाबाट वञ्चित गरिरहने हो भने भोलि ‘मरेँ मरेँ’ भनेर गुहार माग्दा पनि कार्यकर्ताहरू आउन रुचि राख्ने छैनन्,’ उनले उल्लेख गरेका छन्।

पौडेलले पार्टी नेतृत्वलाई आत्मसमीक्षा गर्न सुझाव दिएका छन्, ‘पार्टी संकटमा पर्दा गर्दन थापेका विचारको कलम बोकेका कार्यकर्ता भन्दैछन् — तपाईंहरू त नबदलिनुहोला, तर समय र कार्यकर्ताहरू भने फराकिलो सोच राख्दै, जनताको बहुदलीय जनवाद मान्दै आफैं सोच्ने र निर्णय गर्ने अवस्थामा पुगिसकेका छन्।’

उनको यस्तो अभिव्यक्तिलाई एमालेभित्र बढ्दो आन्तरिक असन्तोष र नेतृत्वप्रति असन्तुष्टिको संकेतका रूपमा हेरिएको छ । बुधबार मात्रै एमाले उपाध्यक्ष विष्णु पौडेलले पहिले सिट्ठी फुकेको भरमा हजारौँको संख्यामा भेला हुने कार्यकर्ता अहिले बोलाउँदा पनि आउन छाडेको बताएका थिए ।