काठमाडौं – गत महिना भारतीय नायक मुकुल देवको ५४ वर्षको उमेरमा निधन भएको थियो । उनको मृत्युको कारण परिवारले गोप्य राखेको थियो ।

मुकुलका दाइ राहुल देव बलिउडका चर्चित खलनायक हुन् । मिडियाले उनलाई भाइको कारणबारे सोध्दा पनि चुप बसे ।

परिवार चुप बसेपछि उनको मृत्युबारे विभिन्न अड्कलबाजी सार्वजनिक हुन थाले । उनको मृत्युको कारण डिप्रेसन हुनसक्ने धेरैको अनुमान थियो ।

घटना भएको एक महिना नबित्दै राहुतले टाइम्स अफ इन्डियासँगको अन्तर्वार्तामा भाइको मृत्युको कारणबारे बोलेका छन् ।

राहुलका अनुसार मुकुल सन् २०१९ देखि दिल्लीमा आफ्ना बिरामी आमाबुबाको हेरचाह गर्दै बसिरहेका थिए। सोहीबेलादेखि उनी सामाजिक जीवनबाट दूरी बढाउन लागे र समयमै खाना नखाने बानी बढेको थियो ।

यही दुई उनको मृत्युको प्रमुख कारण रहेको उनको दाबी छ । मानसिक थकानले मुकुलले आफ्नो स्वास्थ्यको ख्याल राख्न छोडेपछि यो अवस्था सिर्जानले भएको राहुलको बुझाइ छ ।