काठमाडौं– नायिका तथा मोडल नीति शाहले विवाह गरेकी छन् । उनले शुक्रबार जिल्ला अदालत काठमाडौंमा यचित राणासँग कानुनी विवाह गरेकी हुन् ।

दुई वर्षभन्दा बढी समयदेखि नीति र यचित प्रेम सम्बन्धमा थिए । उनीहरुको प्रेमको गसिप गत वैशाखमा सार्वजनिक भएको हो । याचित पेसाले एरोस्पेस इन्जिनियर हुन् ।

काठमाडौं जिल्ला अदालतका सूचना अधिकारी दीपक श्रेष्ठका अनुसार उनीहरूलाई आजै ‘कोर्ट म्यारिज’को प्रमाण पत्र प्रदान गरिएको छ ।

नीतिले आफ्नो विवाह जानकारी सार्वजनिकरुपमा दिएकी छैनन् । खबरहबले विवाहबारे सोध्दा नीतिले जवाफ दिन इन्कार गरिन् ।

नीति ‘मिस नेपाल इन्टरनेशनल २०१७’ को विजेता हुन् । उनले गत वर्ष प्रदर्शनमा आएको ‘खजुरे ब्रो’बाट फिल्ममा डेब्यू गरेकी थिइन् । उनको अभिनय रहेको फिल्म ‘नरसिंहा : अभतार’ जेठ ९ मा प्रदर्शनमा आउँदैछ ।