लिमा- पेरुकी पूर्वप्रथम महिला नादिन हेरेडिया भागेर ब्राजिल पुगेकी छिन् । पेरूको अदालतले उनी र उनका श्रीमान् पूर्वराष्ट्रपति ओलान्ता हुमालालाई सम्पत्ति शुद्धीकरणको आरोपमा १५ वर्षको जेल सजाय सुनाएपछि उनी देश छाडेर भागेकी हुन् । ब्राजिलले उनलाई कूटनीतिक शरण दिएको जनाइएको छ।

‘उहाँ बुधबार आफ्नो छोरासँग राजधानी ब्रासिलिया पुग्नुभएको छ,’ उनका वकिल जुलियो एस्पिनोजाले सीएनएनलाई बताए ।

पेरुको विदेश मन्त्रालयका अनुसार उनले मंगलबार बिहान राजधानी लिमास्थित ब्राजिलियन दूतावासमा शरणका लागि अनुरोध गरेकी थिइन् । जवाफमा ब्राजिलले पनि उनलाई र उनको छोरालाई शरण दिएको हो । र, पेरुभियन सरकारले उनीहरूको सुरक्षित यात्राको ग्यारेन्टी प्रदान गरेको थियो ।

हेरेडियाका वकिलका अनुसार उनले एक अनिर्दिष्ट पारिवारिक कारणले शरणको लागि आवेदन दिएकी थिइन् ।

‘पारिवारिक र व्यक्तिगत निर्णय सजाय सुनाउनुभन्दा करिब दुईदेखि तीन घण्टाअघि यो सबै भयो,’ उनले भने । तर, उनले शरणका लागि पूर्वप्रथम महिलाले अनुरोध गरेको बारेमा मिडिया मार्फत मात्र थाहा पाएको बताए ।