काठमाडौं– अमेरिकी उपराष्ट्रपति जेडी भान्स र द्वितीय महिला उषा भान्सले भारतको भ्रमण गर्ने भएका छन् । उपराष्ट्रपति भान्स चाँडै भारत जान लागेको अमेरिकी सञ्चार माध्यमले जनाएका छन् ।

यो उपराष्ट्रपतिका रुपमा भान्सको दोस्रो विदेश भ्रमण हुनेछ । यसअघि भान्सले युरोप भ्रमण गरिसकेका छन् । स्रोतलाई उद्धृत गर्दै अमेरिकी डिजिटल अखबार पोलिटिकोका अनुसार भान्सले भारतमा रहँदा प्रधानमन्त्री नरेन्द्र मोदीसहित उच्चपदस्थ अधिकारीहरुसँग भेटवार्ता गर्ने कार्यक्रम छ । 

भारतीय सामानमाथि भन्सार बढाउने ट्रम्प प्रशासनले चेतावनी दिइरहेका बेला भान्सले भारत भ्रमण गर्न लागेका हुन् ।

यसअघि भान्स र मोदीबीच पेरिसमा भेटवार्ता भएको भारतीय समाचार संस्था एएनआईले जनाएको छ । त्यसैगरी, द्वितीय महिला उषा भान्स भारतीय मूलकी रहेकाले पनि यो भ्रमण विशेष हुने अपेक्षा गरिएको छ ।