काठमाडौं– परराष्ट्रमन्त्री डा. आरजु राणा देउवाले अमेरिकाको दक्षिण र मध्य एसियाका लागि राष्ट्रिय सुरक्षा परिषद्का वरिष्ठ निर्देशक रिकी गिलसँग इजरायलमा अपहरणमा परेका नेपाली युवा विपीन जोशीको रिहाईका लागि पहल गरिदिन आग्रह गरेकी छन् ।
 
अमेरिकी राष्ट्रपति डोनाल्ड ट्रम्पका राष्ट्रिय सुरक्षा सहायकसमेत रहेका वरिष्ठ निर्देशक गिलसँग भारतको नयाँ दिल्लीमा मंगलबार भएको भेटवार्तामा उनले अध्ययनका लागि इजरायल गएका विपीनको रिहाइका लागि पहल गरिदिन आग्रह गरेकी हुन् । 

भारतको विदेश मन्त्रालयद्वारा आयोजित राइसिना डायलगका क्रममा भएको ‘साइड लाइन’  भेटवार्तामा नेपाल–अमेरिका सम्बन्धका विषयमा कुराकानी भएको र हमासको नियन्त्रणमा रहेका विपीनको रिहाइका लागि पहल गरिदिन अमेरिकी सरकारसँग आग्रह गरिएको राणाको सचिवालयले जनाएको छ । 

इजरायलमा अध्ययनरत नेपाली विद्यार्थी विपीनलाई सन् २०२३ को अक्टोबरमा हमास समूहले इजरायली भूमिबाट अपहरण गरेर लगेका थिए । उनको रिहाईका लागि सरकारले कूटनीतिक पहल जारी राखेको छ ।