काठमाडौं– कोशी प्रदेशको उद्योग, कृषि र सहकारी मन्त्रालयमा टी एलायन्स अफ नेपाल र  केनेक्ट किसानबीचको बैठक सम्पन्न भएको छ ।  नेपालको अर्थोडक्स र विशेष चियाको अन्तर्राष्ट्रिय बजारमा प्रवर्धन गर्नका लागि रणनीतिमा छलफल भएको हो ।

बैठकमा कोशी प्रदेशका उद्योग, कृषि र सहकारीमन्त्री खगेनसिं हाङगाम, प्रदेश सचिव डा. शरण कुमार पाण्डे, कनेक्ट किसानका  निर्देशक राजन दाहाल र टी एलायन्स अफ नेपालका उपाध्यक्ष जीवन न्यौपाने लगायतका प्रमुख व्यक्तिहरू उपस्थित रहेको थियो ।

बैठकमा चियाको गुणस्तर, उत्पादन प्रविधि र बजार पहिचानका बारेमा विशेष ध्यान दिइएको थियो । नेपालका उत्कृष्ट चियाको विश्वव्यापी बजार विस्तार र चिया किसानहरूको सशक्तीकरणलाई प्रवर्धन गर्ने प्रमुख उद्देश्यका साथ विभिन्न रणनीतिहरू प्रस्ताव गरिएको थियो ।

टी एलायन्स अफ नेपाल र  कनेक्ट किसानको संयुक्त प्रयासले नेपालको चिया उद्योगलाई अन्तर्राष्ट्रिय बजारमा मजबुत बनाउन र चिया किसानहरूको आर्थिक समृद्धिमा योगदान पुर्‍याउने आशा गरिएको छ ।