काठमाडौँ– नेकपा एमालेको ११औँ महाधिवेशनअन्तर्गत मतदानको तयारीमा रहेका राष्ट्रिय सभाका पूर्वअध्यक्ष गणेश तिमल्सिनाको महाधिवेशन प्रतिनिधि कार्ड लुकाइएको खुलेको छ।

भृकुटीमण्डपमा जारी महाधिवेशनका लागि मतदान गर्न पुगेका तिमल्सिनाले प्रतिनिधि कार्ड नपाएपछि भोट हाल्न आवश्यक कुपनसमेत लिन सकेका छैनन्। उनको गृहजिल्ला पर्वतकै नेताले बुझेर उनको कार्ड लुकाइदिएको पाइएको एमाले स्रोतले जनाएको छ।

तिमल्सिना एमालेका कुल २ हजार २६३ महाधिवेशन प्रतिनिधिमध्ये मनोनीत कोटाबाट चयन भएका १०८ प्रतिनिधिमध्ये एक हुन्। मनोनीत प्रतिनिधिमध्ये एक जनाको कार्ड लुकाइएपछि उनी अन्योलमा परेका छन्।

पदाधिकारीमा आकांक्षी रहेका तिमल्सिनाले अध्यक्ष केपी शर्मा ओलीबाट टिकट नपाएपछि केन्द्रीय सदस्यमा समेत उम्मेदवारी दिएका छैनन्।

प्रतिनिधि कार्ड नहुँदा मतदान प्रक्रियाबाट वञ्चित भएका तिमल्सिना हाल नयाँ प्रतिनिधि कार्डका लागि निर्वाचन आयोगमा गुहार लगाइरहेका छन्। घटनाबारे पार्टीभित्र आन्तरिक छानबिनको मागसमेत उठ्न थालेको छ।