नयाँदिल्ली- लियोनल मेसीले आफ्नो गट इन्डिया टुर २०२५ सम्पन्न भएपछि सामाजिक सञ्जालमा एक मिनेटको भिडियो शेयर गरेका छन्।

यस भिडियोमा उनको भारत यात्रका केही विशेष पल देखाइएका छन् । जसमा फ्यानसँगको भेटघाट, चार शहरहरूको झलक र विभिन्न स्थानका अनुभव छन् ।

तर, भिडियोमा धेरै राजनीतिक नेताहरू र बलिउड सेलिब्रिटीहरू देखिएका छैनन्। यसमा शाहरुख खान, अजय देवगन, टाइगर श्रफ, राहुल गान्धी, तेलङ्गाना राज्यका मुख्यमन्त्री ए. रेवन्त रेड्डी, महाराष्ट्रका मुख्यमन्त्री देवेन्द्र फडणवीस र दिल्लीकी मुख्यमन्त्री रेखा गुप्ता जस्ता नामहरूको अनुहार समावेश छैनन्।

भिडियोमा मेसीको भेट सचिन तेन्दुलकर र करीना कपुरसँग देखाइएको छ। मेसीले क्याप्सनमा भारतका जनतालाई माया र तातो स्वागतका लागि धन्यवाद दिएका छन्।

उनले भनेका छन्, ‘भारतमा फुटबलको भविष्य उज्ज्वल हुने आशा गर्छु।’ मेसीले १३ डिसेम्बरमा कोलकाताबाट आफ्नो भ्रमण सुरु गरेका थिए । उनी त्यसपछि हैदराबाद, मुम्बई र दिल्ली पुगेका थिए।