भैरहवा– खगेन्द्र र रुद्रकलीलाई लिन कतार एयरवेजको कार्गो जहाज भैरहवास्थित गौतमबुद्ध अन्तर्राष्ट्रिय विमानस्थलमा अवतरण गरेको छ । 

राष्ट्रिय निकुञ्ज तथा वन्यजन्तु संरक्षण विभागले चितवन राष्ट्रिय निकुञ्जमा हुर्काइएका दुवै हात्ती कतारलाई नेपाल सरकारले खगेन्द्र र रुद्रकली उपहारस्वरूप प्रदान गर्न लागेको हो ।

यसअघि मंगलबार खगेन्द्रप्रसाद र रुद्रकलीलाई चितवनबाट भैरहवा पुर्‍याइएको थियो । स्रोतका अनुसार आवश्यक कागजी प्रक्रिया पूरा भएपछि खगेन्द्र र रुद्रकलीलाई जहाजमार्फत गन्तव्यतर्फ लगिने तयारी छ।

विमानस्थलमा सम्बन्धित निकायका प्रतिनिधि तथा सुरक्षाकर्मीको उपस्थिति रहेको बताइएको छ।

कतार पठाउन लागेका खगेन्द्रप्रसाद भाले हात्ती छ वर्षको र रुद्रकली पोथी हात्ती सात वर्षका छन् । विसं २०८१ बैंशाखमा कतारका अमिर शेख तमिम बिन हमाद अल थानीको नेपालको औपचारिक भ्रमणका बेला नेपाल सरकारले एक जोडी हात्ती कतारलाई उपहार दिने जनाएको थियो ।