नयाँ दिल्ली – भारतको विदेश मन्त्रालयले बंगलादेशको पूर्व प्रधानमन्त्री शेख हसिनाबारे इन्टरनेशनल क्राइम्स ट्रिब्युनल अफ बंगलादेश ले सुनाएको फैसलाबारे जानकार रहेको जनाएको छ।

मन्त्रालयले सोमबार जारी गरेको विज्ञप्तिमा भारत बंगलादेशको नजिकको छिमेकी भएको नाताले त्यहाँको शान्ति, लोकतन्त्र, समावेशिता र स्थिरतासहित जनताका हितप्रति प्रतिबद्ध रहने उल्लेख गरेको छ।

वक्तव्यमा भनिएको छ, ‘भारत बंगलादेशका जनताको सबै भन्दा राम्रो हितमा प्रतिबद्ध छ। शान्ति, लोकतन्त्र, समावेशिता र स्थिरताको प्रवर्द्धनका लागि भारत सधैं सबै पक्षसँग रचनात्मक रूपमा संलग्न रहन्छ।’

भारतले बंगलादेशसँगको सम्बन्धलाई दीगो र स्थिर बनाउने प्रयास निरन्तर जारी रहने बताएको छ। बंगलादेशको अदालतले भारतमा निर्वासित जीवन बिताइरहेकी हसिनालाई मृत्युदण्डको सजाय सुनाएपछि नयाँदिल्लीले मुख खोलेको हो ।