एजेन्सी– न्युजिल्याण्डमा अक्टोबर सन् २०२५ सम्म वार्षिक खाद्य मूल्य ४.७ प्रतिशतले बढेको छ, जुन सेप्टेम्बर २०२५ को ४.१ प्रतिशतभन्दा बढी रहेको राष्ट्रिय तथ्यांक विभागले सोमबार जनाएको छ ।

आंकडाका अनुसार, खाद्य मूल्य वृद्धिमा किराना सामग्री समूह प्रमुख रहेको छ, जसको मूल्य ४.९ प्रतिशतले बढेको छ । त्यस्तै, मासु, कुखुरा र माछाको मूल्य ७.६ प्रतिशतले वृद्धि भएको छ । दूध १३.५ प्रतिशत, तत्काल पिउन मिल्ने कफी २५.५ प्रतिशत, चीज ३०.१ प्रतिशत र ताजा अण्डा १८.५ प्रतिशतले महँगो भएको तथ्यांकमा उल्लेख छ ।

‘बिहानको खाजामा अण्डा र कफी सेवन गर्नेहरूले यी वस्तुहरू महँगो भएको महसुस गर्न सक्नेछन्,’ राष्ट्रिय तथ्याङ्क विभागका मूल्य विश्लेषक निकोल ग्रोडेनले बताए।

वार्षिक मूल्य वृद्धिका बावजुद, अक्टोबर महिनामा सेप्टेम्बरको तुलनामा खाद्य सामग्रीको मूल्य ०.३ प्रतिशतले घटेको छ । यसको मुख्य कारण तरकारीको मूल्य १०.७ प्रतिशतले घट्नु हो, जुन नवेम्बर सन् २०२१ पछि सबैभन्दा ठूलो मासिक गिरावट हो ।

त्यस्तै, बिजुली र ग्यासको मूल्य पनि बढ्दै गएको छ । अक्टोबर सन् २०२५ सम्म १२ महिनामा बिजुली ११.८ प्रतिशत र ग्यास १४.४ प्रतिशतले वृद्धि भएको छ । मासिक रूपमा बिजुलीको मूल्य ०.५ प्रतिशत र ग्यासको मूल्य १.९ प्रतिशतले बढेको देखिएको छ । यसरी दुबै साधनको मूल्य लगातार ११ महिनादेखि बढ्दै गएको राष्ट्रिय तथ्यांक विभागले जनाएको छ ।

यस मूल्य वृद्धिले सामान्य नागरिकको दैनिक जीवनमा असर पुर्यायको छ । विशेष गरी दूध, अण्डा, कफी र चीजको मूल्य वृद्धिले खानपिनका वस्तुहरू महँगो भएको महसुस गराएको छ ।