काठमाडौं– राष्ट्रियसभा अन्तर्गतको विकास, आर्थिक मामिला तथा सुशासन समितिले दलित समुदायको अधिकार तथा विकास सम्बन्धमा व्यवस्था गर्ने विधेयकलाई छिटो अघि बढाउन सरकारलाई निर्देशन दिएको छ ।  

सिंहदरबारमा सोमबार बसेका समिति बैठकले नेपालको संविधान धारा ४० बमोजिम दलित समुदायको अधिकार तथा विकास सम्बन्धमा व्यवस्था गर्ने विधेयक तर्जुमा बारेमा छलफल गर्दै छिटो उक्त विधेयक अघि बढाउन सरकारलाई निर्देशन दिएको हो ।

बैठकमा समिति सदस्यहरूले उक्त विधेयकलाई अघि बढाउन सहजताका लागि सरकारलाई मस्यौदा सुझाव प्रतिवेदन दिए पनि सरकारले बेवास्ता गरेको आरोप लगाएका थिए । 

समिति सदस्य बामदेव गौतमले मुलुकमा ठुलो परिवर्तन आए पनि दलित समुदायको अधिकारका लागि कोही पनि गम्भीर हुन नसकेको बरु थिचोमिचो बढ्दै गएको बताए ।  

त्यस्तै अन्य सदस्यहरूले दलित समुदायका नाममा हुने विभेद अन्त्य गर्न कानुनमा नै सुधार गर्नुपर्ने धारणा राखेका थिए ।