काठमाडौं- गत कात्तिक १९ गते १२ दल मिलेर बनेको नेपाली कम्युनिष्ट पार्टी (नेकपा) ले सातै प्रदेशमा एकताको सन्देश दिन सभा गर्ने भएको छ।

नेकपाले सोमबार ती एकता सभाको कार्यतालिका सार्वजनिक गरेको छ । नेकपा गठन भइसकेको अवस्थामा देशव्यापी एकता सन्देश सभा गर्न लागिएको हो ।

प्रदेशस्तरीय एकता सन्देश सभाअन्तर्गत सुदुरपश्चिम प्रदेशको राजधानी धनगढीमा मंसिर १२ गते, लुम्बिनी प्रदेशको राजधानी दाङ-देउखुरीमा मंसिर १३ गते र गण्डकी प्रदेशको पोखरामा मंसिर १४ गते एकता सन्देशसभा हुने भएको छ।

त्यसैगरी, कोशी प्रदेशको विराटनगरमा मंसिर १५ गते, उपत्यका विशेष प्रदेश (काठमाडौं) मा मंसिर १७ गते, कर्णाली प्रदेशको सुर्खेतमा मंसिर १८ गते, संघीय सम्पर्क समन्वय प्रदेश (काठमाडौं) मा मंसिर १९ गते, मधेश प्रदेशको जनकपुरमा मंसिर २० गते सभा हुने भएको छ।

उता प्रवास प्रदेशहरूको संयुक्त भर्चुअल कार्यक्रम मंसिर २१ गते र बागमती प्रदेशको हेटौँडामा मंसिर २३ गते एकता सन्देश सभा आयोजना हुनेछ ।

आगामी मंसिर २६ गतेसम्म प्रदेश कार्यालयको निर्णयअनुसार सबै जिल्लामा एकता सन्देश सभा हुने भएको छ ।

मंसिर २९ गते देशभरका पालिकामा एकता सन्देश सभा हुने भएको छ। एकता सन्देश सभाका कार्यक्रमहरूको आयोजना र व्यवस्थापन सम्बन्धित तहका कार्यालयले गर्ने भएका छन् ।