काठमाडौं – नीर शाह शीर्ष भूमिकामा रहेको फिल्म ‘परान’ले प्रदर्शनको दोस्रो साता बक्स अफिसमा उछाल ल्याएको छ ।

चलचित्र विकास बोर्डका अनुसार कात्तिक २२ देखि २९ सम्मको आठ प्रदर्शन दिनमा यस फिल्मले ६ करोड २५ लाख २८ हजारको व्यापार गरेको हो ।

यो अवधिमा ‘परान’ हेर्नका लागि दुई लाख १८ हजार ४८६ वटा टिकट बिक्री भएको छ ।

यससँगै कात्तिक १४ बाट प्रदर्शनमा आएको ‘परान’को गत शनिबारसम्मको ग्रस कलेक्सन ९ करोड ८६ लाख ९४ हजार पुगेको छ । यस अवधिमा यो फिल्म हेर्नका लागि तीन लाख ४७ हजार १७५ वटा टिकट बिक्री भएको छ ।

यो फिल्म ५८ शोका साथ प्रदर्शनमा आएको थियो । सकारात्मक वल्र्ड अफ माउथका कारण यो फिल्मले प्रदर्शनको चौथो दिनबाट पिकअप लिएको हो ।

यो पनि – समीक्षा : परान भरिएको ‘परान’

कात्तिक २१ बाट प्रदर्शनमा आएका ‘जारी २’ र ‘मन बिनाको धन’सँग बक्स अफिस प्रतिस्पर्धा गर्दा पनि यो फिल्मको व्यापार उत्साहजनक देखिएको छ ।

दीपक आचार्य ‘काकु’को निर्देशनमा बनेको यस फिल्ममा नायकहरु प्रवीण खतिवडा, महेश त्रिपाठी, नायिकाहरु केकी अधिकारी र अञ्जना बराइली मुख्य भूमिकामा छन् ।