काठमाडौं– सडक डिभिजन कार्यालय काठमाडौंले सम्झौता अनुसार समयमै निर्माण सम्पन्न नभएका २५ वटा रुग्ण ठेक्का तोडेको छ । 

डिभिजन अन्तर्गतको संघीय सडक सुपरिवेक्षण तथा अनुगमन कार्यालय काठमाडौंले सोमबार एक सूचना जारी गरेको हो । 

काठमाडौं भित्रका सडक निर्माण तथा मर्मतको लागि व्यवसायीसँग विभिन्न मितिमा ठेक्का सम्झौता भएको थियो । 

व्यवसायीलाई लिखित तथा मौखिक रूपमा समय सीमाभित्रै काम सम्पन्न गर्न अनुरोध गर्दा समेत नटेरेपछि ठेक्का तोडेको कार्यालयले जनाएको छ ।

कार्यालयले कार्तिक ११ मा १५ दिने हदम्यादसहित स्पष्टीकरण माग गर्दा व्यवसायीले अर्थपूर्ण जवाफ नदिएपछि सार्वजनिक खरिद ऐन २०६३ अनुसार कार्तिक ३० मा ठेक्का सम्झौता अन्त्य गरिएको छ । 

पोस्ट समापन मूल्याङ्कनमार्फत निर्धारण हुने रकम सरकारी बाँकी सरह असुल हुने भएकाले अबको १५ दिनभित्र कार्यालयमा सम्पर्क गरी वित्तीय फरफारक मिलाउन व्यवसायीलाई कार्यालयले आग्रह गरेको छ ।