काठमाडौं– क्यानाडाको सरेस्थित कमेडियन कपिल शर्माको क्याफेमा बिहीबार अज्ञात समूहद्वारा फेरी गोली प्रहार भएको छ । यो क्याफेमाथि भएको तेस्रो आक्रमण हो । 

भारतीय मिडिया टाइम्स अफ इन्डियाका अनुसार, कुख्यात ग्याङस्टर लरेन्स बिश्नोईसँग सम्बन्धित भनिने कुलवीर सिधुले सामाजिक सञ्जालमा एउटा स्टाटस पोस्ट गर्दै आक्रमणको जिम्मेवारी स्वीकारेका छन् र आम जनतालाई टाढा बस्न चेतावनी दिएका छन् ।

क्यानाडास्थित सरे पुलिस सर्विसका अनुसार, घटनास्थलमा पुगेपछि व्यवसायमा धेरै गोली लागेको पाइएको छ। घटना भएको समयमा क्याफेभित्र कर्मचारीहरू उपस्थित थिए, तर भाग्यवश कोही घाइते भएका छैनन् ।

क्याफेमा यसअघि पनि ९ जुलाई र ७ अगस्तमा हमला भइसकेको थियो। सामाजिक सञ्जाल एउटा स्टाटस पोस्टमा कुलदीप सिधु र गोल्डी ढिल्लनले भनेका छन्, ‘हामी तीन वटा गोलीवारिको जिम्मेवारी लिन्छौँ । हामीलाई आम जनता सँग कुनै समस्या छैन। जोसँग हाम्रो विवाद छ र जो अवैध काममा संलग्न छन् र पैसा तिर्दैनन्, उनीहरू तयार रहनुपर्छ।’

साथै, बलिउडमा धर्म विरोधी कुरा गर्नेहरूलाई चेतावनी दिइएको छ, ‘तयार रहनुहोस् गोली जहाँबाट पनि आउन सक्छ।’ प्रहरीले समुदायलाई सतर्क रहन र शंका लाग्दा तुरुन्त रिपोर्ट गर्न अनुरोध गरेको छ ।