काठमाडौं- नेपाली कांग्रेस केन्द्रीय कार्यसमितिको बैठक बसिरहेको छ। असोज २८ गतेदेखि जारी बैठकमा केन्द्रीय सदस्यहरूले समसामयिक राजनीतिक विषयमा धारणा राख्नेक्रम जारी छ ।

शुक्रबार बसिरहेको बैठकमा सभापति शेरबहादुर देउवाको कुर्सीलाई खाली राखिएको छ । कार्यवाहक सभापति पूर्णबहादुर खड्का देउवाको कुर्सीनजिकै बसेका छन् ।

देउवाले असोज २८ को बैठकमा सम्बोधन गरेर कार्यकारी नेतृत्व त्याग्ने घोषणा गरेका थिए । उनले उपसभापति खड्कालाई कार्यवाहक सभापतिको जिम्मेवारी दिइसकेका छन् ।

बैठकको प्रारम्भमा कार्यवाहक सभापति खड्काले पछिल्लो राजनीतिक घटनाक्रमबारे जानकारी गराए। यस्तै, महामन्त्री गगनकुमार थापाले बैठकमा विभिन्न प्रस्ताव प्रस्तुत गरेको मुख्यसचिव कृष्णप्रसाद पौडेलले जानकारी दिए।

बिहीबारको बैठकमा केन्द्रीय सदस्यहरू डा. शेखर कोइराला, मोहनबहादुर बस्नेत, देवेन्द्रराज कँडेल, शिवप्रसाद हुमागाईं, राजीव कोइराला, गुरू बराल र नृपबहादुर वडले बोलेका थिए ।

पदाधिकारी र केन्द्रीय सदस्यहरूले बोल्ने क्रम अहिले पनि जारी छ । बैठक शुक्रबार मध्यान्ह साढे ११ बजेदेखि पार्टी केन्द्रीय कार्यालयमा जारी रहेको छ ।

देउवाले पहिलो बैठकमा लिखित मन्तव्य राख्दै स्वास्थ्यका कारणले उपसभापति खड्कालाई कार्यवाहक सभापतिका रूपमा काम गर्नेगरी जिम्मेवारी तोकेका थिए। उनले १५ औँ महाधिवेशनमा पनि नउठ्ने घोषणा गरिसकेका छन् ।