काठमाडौं– नेकपा (एमाले) का उपाध्यक्ष रामबहादुर थापा ‘बादल’ ले नागरिकहरूबाट निर्वाचित सरकारलाई अपदस्थ गरेर अनागरिक सरकार बनाइएको बताएका छन् ।

जेन–जी आन्दोलनको क्रममा आगजनीबाट ध्वस्त भएको च्यासलस्थित एमाले कार्यालयको बुधबार निरीक्षणका क्रमा बादलले संसद् विघटन र अन्तरिम सरकार गठनलाई असंवैधानिक कदम भनेका हुन् ।

केपी शर्मा ओली नेतृत्वको नागरिकबाट निर्वाचित सरकारलाई अपदस्थ गरी संसद् विघटन गरिएको भन्दै उनले आपत्ति जनाए ।

‘अहिले लोकतन्त्रलाई जसरी अपदस्थ गरिएको छ, नागरिक सर्वोच्चताको प्रतीक संसद् हो । संसद् विघटन गरिएको छ । नागरिकहरुले निर्वाचित गरेको सरकारलाई अपदस्थ गरिएको छ, विघटन गरिएको छ’, उनले भने, ’अहिले अनागरिक सरकार स्थापित गरिएको छ । यो असंवैधानिक कदमहरूको हाम्रो पार्टीले विरोध गरिरहेको छ ।’