काठमाडौँ- ललितपुरको गोदावरीस्थित देशकै सबैभन्दा ठूलो सनराइज सम्मेलन केन्द्र भदौ २३ र २४ गरेको जेन-जी आन्दोलनकारीले जलाएर सखाप बनाएका छन् ।

भदौ २० देखि २२ गतेसम्म नेकपा एमालेले विधान सम्मेलन गरेलगत्तै उक्त सम्मेलन केन्द्र जेन-जीका नाममा जलाएर सखाप बनाइएको हो ।

तत्कालीन प्रधानमन्त्री केपी शर्मा ओलीले २०७८ वैशाखमा उत्घाटन गरेको सम्मेलन केन्द्र अहिले खण्डहर बनेको छ । उक्त सम्मेलन केन्द्र बनेसँगै गोदावरी क्षेत्रमा मानिसहरूको चहलपहल ब्यापक बनेको थियो ।

तर सम्मेलन केन्द्र जेन-जीका नाममा जलाइएसँगै त्यस क्षेत्रको एउटा आकर्षणको केन्द्र निभेको छ।

सहरी विकास मन्त्रालयअन्तर्गत करिब ४३ रोपनी १५ आनामा बनेको ३ हजार दर्शक क्षमताका सम्मेलन केन्द्र ८१ करोडमा केसी–समानान्तर जेभीले निर्माण गरेको थियो ।

निर्माण सम्पन्न भएको लगभग ४ वर्षमै आगजनीका कारण सम्मेलन केन्द्र ध्वस्त भएको छ । उक्त सम्मेलन केन्द्र जेन-जी आन्दोलनका क्रममा एमालेको भन्दै आगो झोसिएको थियो । तर नेता र दलको रिस फेर्न देशकै एउटा पहिचान ध्वस्त बनाइएको छ ।

तस्बिरहरू : नेपाल फोटो लाइब्रेरी