काठमाडौं– अहमदिया सम्प्रदायको प्रार्थानास्थलमा आगो लगाएको आरोपमा पाकिस्तानमा ३ सय जनामाथि मुद्दा दर्ता भएको छ । पाकिस्तानको फैसलावादमा रहेका दुई अहमदिया सामुदायिक प्रार्थानास्थलमा आगजनी गरेको आरोपमा ३ सय जनाविरुद्ध मुद्दा दर्ता भएको हो ।

पाकिस्तानबाट प्रकाशित हुने डन अखबारका अनुसार तीमध्ये ४७ जनामाथि किटानी परेको छ । अरुको पहिचान हुन बाँकी छ ।

उनीहरुमाथि पाकिस्तानी दण्ड संहिता तथा प्रतिआतंकवाद ऐत १९९७ अनुसार मुद्दा दायर गरिएको डनले जनाएको छ । घटनामा तहरिक ए लब्बाइक नामक समूहको संलग्नता पाइएको छ ।

पाकिस्तानको संविधानले अहमदियाहरुलाई इस्लामिक चिह्न र पहिचानको प्रयोग गर्न दिँदैन । पछिल्ला केही वर्षयता अहमदियाहरु पाकिस्तानमा हिंसा र लज्जाको सिकार हुँदै आएको भारतीय समाचार संस्था एएनआईले जनाएको छ ।