काठमाडौं – नेपाली कांग्रेसका सभापति शेरबहादुर देउवाले आइतबार आफ्नै निवास बूढानीलकण्ठमा भारतीय विदेश सचिव विक्रम मिस्रीलाई स्वागत गरेका छन्।

देउवाले भेटपछि सामाजिक सञ्जालमार्फत् जानकारी दिँदै मिस्रीसँगको छलफल नेपाल–भारतबीचको घनिष्ठ र बहुआयामिक सम्बन्धलाई अझ सुदृढ बनाउन केन्द्रित भएको बताए।

उनले भनेका छन्, ‘हाम्रो सम्बन्ध आपसी विश्वास, सद्भावना र क्षेत्रीय समृद्धि तथा स्थायित्वप्रतिको साझा आकांक्षामा आधारित छ।’

भारतीय विदेश सचिव मिस्री दुईदिने औपचारिक भ्रमणका लागि आइतबार काठमाडौं आएका हुन्।

भ्रमणका क्रममा उनले उच्च राजनीतिक तथा सरकारी तहका व्यक्तिहरूसँग भेटवार्ता गर्ने कार्यक्रम छ। उनले आइतबार नै प्रधानमन्त्री केपी शर्मा ओलीलाई भारत भ्रमणको निम्तो दिएका छन् । उनले राष्ट्रपति रामचन्द्र पौडेलसँग पनि संवाद गरिसकेका छन् ।