काठमाडौं – निर्माण घोषणादेखि नै चर्चामा रहेको फिल्म ‘बलिदान’को टिजरले दर्शकबाट राम्रो साथ पाएको छ । सार्वजनिक भएको सुरुवाती २४ घण्टामा नै यस टिजरले युट्युबमा १० लाखभन्दा बढी भ्युज पाएको हो ।

टिजरमा समीरका फ्यानको फलोइङ देख्न सकिन्छ । फ्यानहरुले ‘समीरलाई ठूलो पर्दामा हेर्न प्रतीक्षारत रहेको’ आशयको कमेन्ट गरेका छन् । यस्ता कमेन्ट उल्लेखनीय संख्यामा देख्न सकिन्छ ।

टिजरमा निर्माण पक्षले समीरलाई ‘एक्सन किङ’को ट्याग दिएको छ । दोस्रो फिल्म प्रदर्शनमा नआउँदै उनले उक्त ट्याग पाएका हुन् ।

समीर हाबी भएको टिजरमा नायकहरु अर्पण थापा, सौगात मल्ल, मोडल सुनील क्षेत्री, नायिका ऋचा शर्मालाई स्थान दिएको हो ।

अपर्ण नेताको भूमिकामा छन् भने सौगातको भूमिका रहस्यमयी छ । ऋचाले ग्रामिण अधवैशे महिलाको भूमिका निर्वाह गरेको टिजरले प्रष्ट पारेको छ ।

फिल्मका निर्देशकसमेत रहेका सन्तोष सेन पनि टिजरमा अटाएका छन् । उनी भूमिका पनि रहस्यमयी छ । उनी दानव अवतारमा देखिएका छन् ।

फिल्ममा एक्सन खुराकहरु प्रशस्त रहेको टिजरले बताउँछ ।

चलचित्र आसुसेन फिल्म्स प्रालिको ब्यानरमा बनेको यस फिल्मको निर्माता पवन ब्राडफोर्ड बिस्ट हुन् । फिल्मको लेखक दर्शन जी हुन् ।