‍काठमाडौं-  चर्चित युट्युबर, अभिनेता तथा बिग बोस विजेता एल्विश यादवको घरमा अज्ञात समूहले आइतबार बिहान गोली प्रहार गरेका छन् । 

गुरुग्रामको सेक्टर–५७ मा अवस्थित घर नजिक बिहान करिब ५:३० देखि ६ बजेबीच मोटरसाइकलमा आएका तीन जनाले २० देखि २५ राउन्ड गोली चलाएको प्रारम्भिक विवरणमा उल्लेख छ ।

घटनाको समयमा यादव घरमा थिएनन् । तर उनका बुबा–आमासहित परिवारका अन्य सदस्यहरू घरमै थिए । एल्विशका बुबाका अनुसार, ‘यस घटना भन्दा अगाडी कुनै धम्की आएको थिएन । सबै जना सुतेको बेला अज्ञात समूहले गोली चलाएर भागे ।’

फायरिङको जानकारी पाएको केही मिनेटमै प्रहरी घटनास्थल पुगेको थियो । प्रहरीले इलाकालाई घेराबन्दी गरी अनुसन्धान सुरु गरेको छ ।

वरिपरिको सिसीटिभी फुटेज जाँच गर्ने क्रममा घरको गेट बाहिर दुई जना व्यक्तिहरू देखिएको प्रहरी स्रोतले जनाएको छ । हालसम्म हमला गर्नेहरूको  पहिचान खुलेको छैन ।

एल्विश यादव सामाजिक सञ्जालमार्फत चर्चामा रहेका कलाकार हुन् । उनी आफ्ना भ्लग्स, रोस्ट भिडियो मार्फत सक्रिय छन् । 

तर विगतमा उनी नाइट पार्टी प्रकरण, सर्प विष केस, विवादास्पद टिप्पणी र प्रहरीसँगको मतभेदका कारण पटक–पटक विवादमा तानिइसकेका छन् ।