काठमाडौं- नेकपा (एमाले) का सचिव योगेश भट्टराईले वर्तमान सरकारमा रहेका मन्त्रीहरूले गल्ती गरेको पाइए उन्मुक्ति नपाउने बताएका छन् ।

पार्टी सचिवालय बैठक सहभागी हुन च्यासलमा रहेका उनले बिहीबार सञ्चारकर्मीसँग राकानी गर्दै उनले गल्ती गरेको पाइए मन्त्रीहरूले जिम्मेवारीबाट हट्नुपर्ने बताए ।

उनले केही मन्त्रीहरू घुस प्रकरणमा मुछिएकोबारे उपयुक्त छानबिन हुनुपर्ने पनि बताएका छन् ।

‘मन्त्रीहरूले विवादबाट उन्मुक्ति पाउँदैनन् । यदि त्यो सत्य हो भने उहाँहरुले पदीय जिम्मेवारीबाट हट्नुपर्छ र त्यसको उपयुक्त छानविन हुनुपर्छ,’ भट्टराईले भने ।

उनले नेपालमा बिनातथ्य, बिनाप्रमाण आरोप लगाउने चलन रहेको पनि उल्लेख गरेका छन् ।

आरोप लागेपछि एमालेका मन्त्रीहरू गोकुल बास्कोटादेखि शेरबहादुर तामाङसम्मले राजीनामा दिएको पनि उनले उल्लेख गरे ।

आरोप लगानेबित्तिकै कसैको राजनीतिक जीवन नै सक्ने ढंगले जान नहुने उनले बताए । पूर्वमन्त्री भट्टराईले एमाले शुद्धीकरण अभियानमा रहेको पनि जानकारी दिए ।

‘एमालेले नै यसअघि त्यो दृष्टान्त प्रस्तुत गरेको छ । यद्यपि कतिपय घटना प्रमाणित भएका छैनन् । गोकुलजीको सन्दर्भमा पनि प्रमाणित भएन । तर, उहाँले राीनामा दिनुभयो’, उनले भने, ‘शेरबहादुर तामाङ सामान्य बोलीमा चिप्लिएका हुन्, त्यो ठूलो कुरा थिएन । हङ्गामा मात्रै गरियो । उहाँले पनि छोड्दिनुभएकै हो । अहिले राजकुमार गुप्ताजीले छोड्दिनु भएको छ ।’