काठमाडौं- नेपाली कांग्रेसका नेता डा. शेखर कोइराला र नेकपा (माओवादी केन्द्र) का अध्यक्ष पुष्पकमल दाहालबीच दुई घण्टा लामो वार्ता भएको छ।

केपी शर्मा ओली नेतृत्वको गठबन्धन सरकारसँग असन्तुष्ट शेखर आफैं प्रमुख प्रतिपक्षी दलका नेता दाहालसँग वार्ताका लागि खुमलटार पुगेका हुन् ।

दुईजनाबीच पछिल्लो समसामयिक राजनीतिक विषयमा छलफल भएको कोइरालाको सचिवालयले जनाएको छ।

कांग्रेस–एमाले सरकार गठन भएको एक वर्ष पुगिरहँदा कांग्रेसका एकजना नेता कोइराला प्रमुख प्रतिपक्षीकहाँ पुगेका हुन् । शेखरले यसअघि पनि सार्वजनिक रुपमै सरकारको कडा आलोचना गर्दै आएका छन् । दुईतिहाइ नजिकको सरकार भए पनि जनताका अपेक्षा पूरा गर्न नसकेको भन्दै शेखर विकल्पको खोजीमा लागेका छन् ।

यस्तोमा उनी खुमलटार पुगेका हुन् । सरकार एक वर्षे कार्यकालको समीक्षामा लागिरहेका बेला शेखरले प्रचण्डसँग गरेको कुराको विस्तृत विवरण आएको छैन ।

प्रचण्डले आफूलाई हटाएर सात दलीय गठबन्धन सरकार बनेदेखि भ्रष्टाचार बढेको, हरेक क्षेत्रमा बेथिति देखिएको पनि बताउँदै आएका छन् । सरकारले हिनामिना र अनियमिततामा मुछिएका आफूनिकटलाई जोगाएर प्रतिपक्षी र अन्यलाई मात्रै डाम्ने गरेको आरोप लगाएको सन्दर्भमा शेखरसँग वार्ता गरेका हुन् ।