काठमाडौं– इरानको बैंकमा व्यापक साइबर आक्रमण भएको छ । इरानको सबैभन्दा पुरानो वित्तीय संस्था सेपाह बैंकमा साइबर आक्रमण भएको हो ।

इजरायली ह्याकर समूह ‘प्रेडेटरी स्प्यारो’ ले साइबर आक्राणको जिम्मा लिएको छ । यस बैंकको सम्बन्ध इरानको रिभल्युसनरी गार्ड कोरसँग रहेको दाबी गरिएको छ ।

उक्त ह्याकिङ समूहले उक्त बैंकको साइबर स्पेसमा आक्रमण गरी सबै डेटा नष्ट गरिदिएको दाबी गरेको छ । साइबर आक्रमण भएसँगै इरानभर बैंकिङ सेवा प्रभावित भएको थियो ।

सेपाह बैंकका १ हजार ८ सयभन्दा धेरै शाखाहरु रहेको जनाइएको छ । इरानबाहेक यस बैंकले बेलायत, फ्रान्स, जर्मनी र इटालीमा पनि सेवा प्रदान गर्दै आएको जनाइएको छ ।

यस बैंकमाथि सन् २०१९ मा अमेरिकाले प्रतिबन्ध लगाएको थियो । यसबारे इरानी अधिकारीले कुनै प्रतिक्रिया नदिएको इरान इन्टरनेशनलले जनाएको छ ।

यद्यपि आईआरजीसीसँग सम्बन्धित फार्स समाचार संस्थाले सेपाह बैंकमा देखिएको समस्याको समाधान चाँडै हुने जनाएको थियो । ‘प्रेडेटरी स्प्यारो’ ले यसअघि इरानका स्टिल कारखाना र ऊर्जा केन्द्रलाई लक्षित गरी आक्रमण गरेको दाबी गरेको थियो ।