काठमाडौं– इजरायलका रक्षामन्त्री इजरायल कट्जले इरानी सर्वोच्च नेता आयातोल्लाह अली खामेनेईलाई इराकका पूर्वशासक सद्दाम हुसैनकै हालतमा पुर्‍याइदिने चेतावनी दिएका छन् । उनले आयातोल्लाह अली खामेनेईको अन्त्य पनि सद्दाम हुसैनकै जस्तो हुने दाबी गरेको इजरायलका स्थानीय सञ्चार माध्यमले जनाएका छन् ।

सन् २००३ मा इराकमा अमेरिकाले आक्रमण गरेपछि पदच्युत गरिएका सद्दाम हुसैनलाई फासी दिइएको थियो । ‘म इरानी तानाशाहलाई युद्ध अपराध नगर्न र इजरायली नागरिकमाथि क्षेप्यास्त्र प्रहार नगर्न चेतावनी दिन चाहन्छु ।’ रक्षामन्त्री कट्जलाई उद्धृत गर्दै कतारी टेलिभिजन अल जजीराले जनाएको छ ।

शुक्रबार इजरायलले इरानमाथि गरेको हमलाका कारण सयौँ इरानी मारिएका छन् भने त्यसको प्रतिकारस्वरुप इरानले गरेको हमलामा पनि दर्जनौँ इरजरायली मारिएका छन् । दुई मुलुकबीच अझै पनि आक्रमण प्रत्याक्रमण जारी छ ।

‘उनलाई (खामेनेई) इरानको छिमेकी देशका तानाशाह उनीजस्तै इजरायली राज्यविरुद्ध जाँदा कुन अवस्थामा पुगे भन्ने राम्रोसँग सम्झना छ ।’ कट्जले भने, ‘हामी तेहरानको सत्ता र सैन्य निशानामा आज पनि हमला गर्छौँ ।’ उनले तेहरानका स्थानीय बासिन्दालाई तेहरान छाड्न पनि आह्वान गरे ।