काठमाडौं- सभामुख देवराज घिमिरेले नीलो स्कार्फ लगाएर संसद्‍मा छिरेका राष्ट्रिय स्वतन्त्र पार्टीका सांसदहरू आफैं स्वनियमनमा बस्नुपर्ने बताएका छन् ।

भिजिट भिसा प्रकरणमा मुछिएका गृहमन्त्री रमेश लेखकको राजीनामा माग्दै विरोधमा उत्रिएका रास्वपा सांसदहरूलाई संसद् बैठकबाट निष्काशन गर्न प्रमुख सत्तारुढ नेपाली कांग्रेसले माग गरेका सन्दर्भमा घिमिरेले यस्तो जवाफ दिएका हुन् ।

कांग्रेससहित अन्य दलका सांसदहरूले पनि सदनमा रास्वपा सांसदहरू नीलो स्कार्फमा प्रवेश गरेकोबारे सभामुख घिमिरेको ध्यानाकर्षण गराएका थिए ।

उनीहरूले संसद्मा क्रमशः अमर्यादित गतिविधि बढिरहेको भन्दै नियन्त्रणका लागि आग्रह गरेको सन्दर्भमा सभामुखको यस्तो जवाफ आएको हो ।

‘यसबारेमा मेरो गम्भीर ध्यानाकर्षण भएको छ’, उनले भने, ‘संसदीय मर्यादाभित्र बस्नु स्वयम् सांसद र राजनीतिक दलहरूको कर्तव्य हो । म यसबारे स्वनियमनको पक्षमा रहेको छु ।’

मंगलबार दिउँसो २ बजे बसेको प्रतिनिधिसभाको बैठकमा नियमापत्ति जनाउने क्रममा कांग्रेसका प्रमुख सचेतक श्याम घिमिरेले रास्वपा सांसदहरूलाई बैठकबाट निकाल्न माग गरेका थिए ।

‘सभामुख महोदय, संसद् सचिवालयको नियमावली ३० मा अभद्र व्यवहार नियन्त्रको व्यवस्था छ । नियम ३१ मा बैठक कक्षबाट निष्कासन गर्ने व्यवस्था छ’ नीलो स्कार्फसहित प्रतिनिधिसभा बैठकमा पुगेका रास्वपा सांसदहरूतिर लक्षित गर्दै उनले भनेका थिए, ‘नीलो स्कार्फ लगाएर संसद्मा आउनु मर्यादित हुन्छ कि हुँदैन ? भोलि हाफ पाइन्ट मात्रै लगाएर आउने, जथाभावी पोशाकमा आउने गरे, त्यो संसद्को मर्यादामा पर्छ कि पर्दैन ?’