काठमाडौं– प्रतिपक्षी राष्ट्रिय स्वतन्त्र पार्टी (रास्वपा) ले भिजिट भिसा प्रकरणको छानबिनका लागि उच्चस्तरीय छानबिन समिति वा न्यायिक समिति गठन हुनुपर्ने माग दोहोर्‍याएको छ । 

प्रतिनिधिसभाको मंगलबारको बैठकको सुरुवात मै सभामुख देवराज घिमिरेले उपलब्ध गराएको समयमा बोल्दै सांसद चन्दा भण्डारी कार्कीले उच्चस्तरीय छानबिन समिति वा न्यायिक समिति गठनको माग गरेकी हुन् । 

रास्वपा केही दिनदेखि संसद्मा भिजिट भिसा प्रकरणको छानबिनका लागि समिति गठनको माग गर्दै आएको छ । मंगलबारको बैठकमा सांसद कार्की बोलिसकेपछि नेपाली कांग्रेसको प्रमुख सचेतक श्याम घिमिरे बोलेका थिए । 

उनले रास्वपाका सांसदले घाँटीमा पहिरिएको निलो रंगको रिबन लगाइएको भन्दै संसद्‌मा मर्यादित पोसाक लगाएर उपस्थित हुनुपर्ने बताए । बैठक ३० मिनेटका लागि स्थगित भएको छ ।