काठमाडौं – राष्ट्रिय स्वतन्त्र पार्टी (रास्वपा)ले पार्टीको महाधिवेशनको मिति तोकेको छ । बिहीबार पार्टीको केन्द्रीय कार्यालय वनस्थलीमा बसेको केन्द्रीय समिति बैठकले महाधिवेशनको नयाँ मिति घोषणा गरेको हो ।

२०८२ आश्विनसम्ममा वडा अधिवेशन,कार्तिक सम्ममा पालिका अधिवेशन, मङ्सिरसम्ममा जिल्ला अधिवेशन गर्ने बैठकले निर्णय गरेकाे छ । माघ १५ सम्ममा प्रदेश अधिवेशन सम्पन्न गरिसक्ने तय गरिएकाे छ ।

त्यस्तै फागुन ७, ८ र ९ गते चितवनमा राष्ट्रिय महाधिवेशन गर्ने निर्णय गरिएको पार्टी कार्यवाहक प्रवक्ता मनिष झाले बताए ।

हालसम्म राष्ट्रिय स्वतन्त्र पार्टीको १९७५ वडा समिति गठन भइसकेको र त्यसमध्ये ७०० वडामा अधिवेशन सम्पन्न भइसकेको छ । ७५३ पालिकामध्ये ४५८ पालिकामा समिति गठन भइसकेको छ । ७० जिल्लामा भेला आयोजना भएर समिति गठन भइसकेको छ । सातै प्रदेशमा समिति गठन भएको झाले जानकारी दिए ।

साथै बैठकले शिक्षा विधेयक ल्याउन माग गर्दै आन्दोलन गरिरहेका शिक्षकहरूको माग न्यायोचित तरिकाबाट सम्बोधन गर्नको लागि संसद अधिवेशनमा सशक्त रुपमा प्रस्तुत हुने पनि निर्णय गरेको छ ।

बैठकमा पार्टी उपसभापति डा. स्वर्णिम वाग्लेले पार्टीले बनाउँदै गरेको ‘ब्लु प्रिन्ट’ बारे खाका प्रस्तुत गर्दै सोको उद्देश्य, सानो आकार र कम खर्चिलो सरकार, राजनीतिक नियुक्तिको उद्देश्यले गठित नियोग र आयोगको कटौती र सार्वजनिक सेवामा सुधार रहेको व्याख्या प्रस्तुत गरेका थिए ।

बैठकले पार्टीको संसदीय दलको उपनेता विराजभक्त श्रेष्ठको संयोजकत्वमा गठित पार्टीको ‘जनयात्रा अभियान’ को कार्यविधि सर्वसम्मतले पारित गरेको रास्वपाले जनाएको छ ।