काठमाडौं – गत बिहीबारबाट प्रदर्शनमा आएको फिल्म ‘आउटल : दफा २१९’ले दर्शकबाट अपेक्षित साथ पाएको निर्माण पक्षको दाबी छ ।

यस फिल्मले प्रदर्शनको सुरुवाती चार दिनमा दुई करोड तीन लाख ग्रस कलेक्सन गरेको निर्माण पक्षले दाबी गरेको हो।

फिल्मका निर्माता अमित अग्रहरीले बिहीबार, शुक्रबार, शनिबार र आइतबारको ग्रस कलेक्सन उक्त रकम बराबर भएको दाबी गरे ।

फिल्मका नायक सुशिल श्रेष्ठले पनि सामाजिक सञ्जालमा फिल्मले दुई करोडभन्दा बढी कलेक्सन गरेको दाबी गरेका छन् ।

नायक श्रेष्ठले लेखेका छन्, ‘दर्शकहरूको अपार माया र समर्थनले आउट ल : दफा २१९ नेपाली बक्स अफिसमा नयाँ इतिहास बनाउँदैछ !’

यो फिल्म सोमबार पाँचौ दिनमा प्रदर्शनरत छ । नायक श्रेष्ठसहित नरेश पौडेल, शिक्षा संग्रौला प्रमुख भूमिकामा छन् ।

सामाजिक कथामा एक्सन मिश्रण गरी निर्माण भएको यस फिल्मले न्यायको विषय उठान गरेको छ । फिल्ममा बिक्की महर्जनको लेखन तथा निर्देशन रहेको छ ।