काठमाडौं– पद्मकन्या बहुमुखी क्याम्पसमा हुन गइरहेको स्वतन्त्र विद्यार्थी युनियन (स्ववियु) निर्वाचनको विषयलाई लिएर नेपाल विद्यार्थी संघ (नेविसंघ)मा विवाद चर्किएको छ । 

निर्वाचनका लागि स्वतन्त्रतर्फ मनोनयन दर्ता गरेको भुपेश्वरी ऐरलाई अध्यक्ष दुजाङ शेर्पाले आधिकारिक समर्थन गरेपछि पद्मकन्यामा नेविसंघमा विवाद चर्किएको हो । 

पद्मकन्यामा नेविसंघका तर्फबाट पूर्णिमाया परियारले र भुपेश्वरीले स्वतन्त्रतर्फ समूहसहित अध्यक्षमा उम्मेदवारी दिएका थिए । परियार स्ववियुको वर्तमान कार्यसमिति सदस्य र ऐर सचिव हुन् । दुवै नेविसंघमा आवद्ध छन् । 

पद्मकन्याको निर्वाचन समिति कार्यालयले सार्वजनिक गरेको उम्मेदवारहरूको अन्तिम नामावलीमा परियारको प्यानललाई नेविसंघ र ऐरको प्यानललाई स्वतन्त्र समूह भनिएको छ । 

उम्मेदवारहरूको अन्तिम नामावली सार्वजनिक गरिसकेपछि नेविसंघ अध्यक्ष शेर्पाका नामबाट स्वतन्त्रतर्फ उम्मेदवारी दर्ता गरेकी ऐरलाई समर्थन गरेको पत्र सार्वजनिक भएको थियो । 

उक्त पत्र सार्वजनिक भएपछि पद्मकन्या स्ववियु अध्यक्ष ज्योति पनेरुले सामाजिक सञ्जाल फेसबुकमार्फत् स्वतन्त्र समूह दर्ता गरेका उम्मेदवार आधिकारिक हुनुको कारण सोधेकी छन् । 

‘भ्रमको खेती कति दिन सम्म । आधिकारिक हुन त पहिले दुई वा दुईभन्दा बढी नेविसंघको नाममा दर्ता वा उम्मेदवारी हुनुपर्यो नि । स्वतन्त्र समूह दर्ता गरेर उम्मेदवारचाँहि आधिकारिक कसरी भयो ?,’ प्रश्न गर्दै उनले लेखेकी छन्, ‘पद्मकन्यामा एउटा नेविसंघ छ र टिम पनि एउटै लड्दै छ ।’

यसअघि नेविसंघ अध्यक्ष शेर्पाको नाममा सार्वजनिक भएको पत्रमा ऐरको नेतृत्वमा दर्ता भएको समूह आधिकारिक भएको उल्लेख थियो ।

‘नेविसंघको आधिकारिक समर्थन श्री भुपी ऐर नेतृत्वमा दर्ता गरिएको प्यानललाई रहेको प्रष्ट पार्दछु,’ पत्रमा लेखिएको थियो ।