काठमाडौं- नेकपा माओवादी केन्द्र नेतृत्वको विपक्षी दलहरूको समूह राष्ट्रिय स्वतन्त्र पार्टी पनि जोडिएपछि पूर्वमहामन्त्री मुकुल ढकालले आक्रोश पोखेका छन् ।
संसद्को चौथो र पुराना दलको विकल्पका रूपमा रहेको रास्वपा सबैको विपक्षीका रुपमा खडा हुनुपर्नेमा सरकारको विरोध गर्ने समूहको पछि लागेको भन्दै ढकालले आपत्ति जनाएका हुन् ।
उनले रास्वपा कांग्रेस-एमाले-माओवादी र उनीहरूबाट टुटेफुटेका सबै दलको विपक्षी रहेको जिकिर गर्दै पुरानालाई बोकेर हिँडेर कहीँ नपुगिने पनि उल्लेख गरेका छन् ।
‘रास्वपा विपक्षी हो , तर सरकारको मात्र विपक्षी होइन , कांग्रेस-एमाले-माओवादी र यिनीहरूबाट टुटेफुटेका सबै दलको विपक्षी हो’, उनले भनेका छन्, ‘नो नट अगेन । पुरानालाई बोकेर कतै पुगिन्न ।’
रास्वपाले दुई-दुई पटक सरकारमा गएर गरेको गल्ती गरेको बताउँदै विपक्षी गठबन्धनमा सहभागी हुनुलाई पनि त्यही गल्तीको निरन्तरता भनेका छन् ।
‘नो नट अगेन’ भनेर हामीले मत पाएको तथ्य हामीले बिर्सन हुँदैन । बारम्बार एउटै गल्ती दोहोर्याउँदा जनमत हामीबाट भड्कन सक्छ, सचेत बनौँ’, उनले भनेका छन् ।
विपक्षी दलका लागि तय गरिएको शुक्रबारको पत्रकार सम्मेलनको मञ्चमा पनि रास्वपालाई अपमान गरिएको उनको तर्क छ । ‘यो मञ्चमा हाम्रो उपस्थिति चित्त बुझ्ने कुरा होइन’, उनले भनेका छन्, ‘त्यसमाथि, चौथो शक्तिका कार्यवाहक सभापति (डोलप्रसाद अर्याल) को कुर्सी जता राखियो, त्यो पनि अपमानजनक छ ।’
प्रतिक्रिया