काठमाडौं – सन् १९९० को दशकमा भुटानबाट खेदिएका नेपाली भाषीहरूको कथामा फिल्म ‘ल्हो–छाम्पा’ बन्ने भएको छ ।

निर्माण पक्षका अनुसार यस फिल्मलले नेपालीभाषी भुटानी स्वदेशबाट लखेटिँदाको अवस्था, शरणार्थी शिविरका समस्या र तेस्रो देश पुनर्वासमा जानुअघि शिविरमा भोग्नु परेको पीडा उजागर गर्नेछ ।

यो फिल्मको निर्माता अर्जुन सुवेदी हुन् । उनी तेस्रो देश पुनर्वासक्रममा अमेरिका रहेका भुटानीमूलका नागरिक हुन् ।

आफूहरूले भोगेका घटना दस्तावेजका रुपमा राख्न फिल्म निर्माण गर्ने सोच पलाएको निर्माता सुबेदी बताउँछन् ।

भन्छन्, ‘भुटानदेखि नेपालका शरणार्थी शिविरसम्ममा हाम्रो पुस्ताले भोगेको सास्ती दृश्यको माध्यममा संरक्षित रहोस् भन्ने उद्देश्य हो ।’

फिल्मका कलाकार चयन हुन बाँकी रहेको सुवेदीले बताए । यो फिल्मको पटकथा सामीप्यराज तिमल्सेना हुन् । निर्देशक भने नरेशकुमार केसी हुन् ।

नक्षत्र लाइभ म्युजिकको प्रस्तुती रहने यस फिल्मको छायाङ्कन वैशाखको दोस्रो सातादेखि सुरु गर्ने योजनाका साथ तयारी भइरहेको निर्माता सुवेदीको भनाइ छ ।