काठमाडौं– संसदीय काम कारबाहीका सम्बन्धमा प्रमुख सचेतकहरूले सिंहदरबारमा छलफल गरेका छन् । छलफल नेकपा एमाले संसदीय दलको कार्यालय सिंहदरबारमा भएको हो । 

संसद्को अधिवेशन नचलेका बेला प्रतिपक्षी र सत्ता पक्षका सचेतकहरूले सिंहदरबारमा छलफल गरेको एमाले प्रमुख सचेतक महेश बर्तौलाले जानकारी  दिए । 

बर्तौलाका अनुसार सचेतकहरूको बैठकमा कांग्रेस प्रमुख सचेतक श्याम घिमिरे, एमालेका बर्तौला, माओवादी केन्द्रका हितराज पाण्डे र राष्ट्रिय स्वतन्त्र पार्टीबाट प्रमुख सचेतक सन्तोष परियार छन् । 

सरकारले हिउँदे अधिवेशनको रूपमा रहेको विधेयक अधिवेशन बोलाउन सकेको छैन । यो अधिवेशन मागको पहिलो साता नै बोलाउने भनिए पनि ५ वटा अध्यादेश ल्याएर सरकार सांसदबाट भागिरहेको प्रतिपक्षीको आरोप छ। सक्ता पक्षका नेताहरू भने माग १५गतेसम्ममा अधिवेशन बोलाउने सरकारको तयारी रहेको दाबी गर्छन् । 

आज मन्त्रीपरिषद् बैठक गरेर सरकारले सदन खुलाउने निर्णय गर्न सक्ने प्रधानमन्त्रीको सचिवालय बताउँछ ।