काठमाडौं– चीन सरकारले नेपाली विद्यार्थीहरूका लागि एमबीबीएस सहित विभिन्न विषयमा कुल ३३ छात्रवृत्ति उपलब्ध गराउने भएको छ। शिक्षा, विज्ञान तथा प्रविधि मन्त्रालय तथा चिकित्सा शिक्षा आयोगले उक्त छात्रवृत्तिका लागि आवेदन प्रक्रिया अघि बढाएको छ ।

चिनियाँ सरकारी छात्रवृत्ति कार्यक्रमअन्तर्गत एमबीबीएस कार्यक्रमका लागि ४ सिट छुट्याइएको छ । त्यसैगरी स्नातक, स्नातकोत्तर तथा विद्यावारिधि पिएचडी तहमा इन्जिनियरिङ, मेडिकल साइन्स, सूचना प्रविधि, अर्थशास्त्र, व्यवस्थापन, कृषि तथा पशु विज्ञान, शैक्षिक व्यवस्थापनलगायत विभिन्न विषयमा छात्रवृत्ति प्रदान गरिनेछ ।

चिकित्सा शिक्षा आयोगका अनुसार  एमबीबीएस तर्फ आवेदन दिन इच्छुक उम्मेदवारले लाइन आवेदन दिनुपर्नेछ। एकीकृत प्रवेश परीक्षामा उत्तीर्ण भई योग्यताक्रममा परेका उम्मेदवारहरूबाट छात्रवृत्तिका लागि छनोट गरिनेछ ।

त्यस्तै, स्नातक, स्नातकोत्तर तथा विद्यावारिधि तहका लागि आवेदन दिने उम्मेदवारहरूले आवश्यक शैक्षिक प्रमाणपत्र, नेपाली नागरिकताको प्रमाणपत्र, पासपोर्टको प्रतिलिपि तथा अन्य तोकिएका कागजातसहित शिक्षा, विज्ञान तथा प्रविधि मन्त्रालयको छात्रवृत्ति शाखा, सानोठिमी, भक्तपुरमा आवेदन पेश गर्नुपर्ने जनाइएको छ ।

आयोगका अनुसार स्नातक तहका लागि २५ वर्ष, स्नातकोत्तर तहका लागि ३५ वर्ष र विद्यावारिधि तहका लागि ४५ वर्ष उमेर ननाघेको हुनुपर्नेछ । विद्यावारिधि तहमा अर्थशास्त्र, इन्जिनियरिङ, मेडिकल साइन्स, सूचना प्रविधि, व्यवस्थापन, शैक्षिक व्यवस्थापन तथा कृषि तथा पशु विज्ञान विषयमा कुल ९ सिट छुट्याइएको छ ।

आवेदन बुझाउने अन्तिम मिति तहअनुसार फरक-फरक तोकिएको छ । सम्बन्धित निकायले समयमै आवेदन दिन र आवश्यक प्रक्रिया पूरा गर्न इच्छुक विद्यार्थीहरूलाई आग्रह गरेको छ ।