काठमाडौं– नेपाल चिकित्सक संघले युरोप नेपाल हेल्थ अवार्ड २०२५ प्राप्त गरेको छ । सोसाइटी अफ नेप्लिज हेल्थकेयर प्रोफेसनल्स इन युरोपले नेपाल चिकित्सक संघलाई युरोप–नेपाल स्वास्थ्य पुरस्कार २०२५ प्रदान गरेको हो । 

युरोपमा सक्रिय रहेका नेपाली स्वास्थ्य सेवाकर्मीहरूको समाजले पुरस्कार स्वरुप संघलाई एक लाख रुपैयाँ र ताम्रपत्र प्रदान गरेको हो ।

सन् २०२५ मा नेपालमा रेजिडेन्ट चिकित्सकहरूको अधिकार र भत्ताहरू सुनिश्चित गर्ने संघर्ष र योगदानको कदर स्वरूप यो सम्मान प्रदान गरेको नेप्लिज हेल्थकेयर प्रोफेसनल्स इन युरोपले जनाएको छ ।

अवार्ड कार्यक्रममा बोल्दै नेपाल चिकित्सक संघका अध्यक्ष डा. अनिल बिक्रम कार्कीले सम्मानले थप जिम्मेवारी र काम गर्ने हौसला  बढेको बताए ।

कार्यक्रममा प्रा.डा.अञ्जनी कुमार झा, डा. अनिल विक्रम कार्की, डा. प्रमोद जोशी, डा. लोचन कार्की, डा. आनन्द प्रसाद श्रेष्ठ, डा. चोपलाल भुसाल, डा. रमेश कान्त अधिकारी, डा. बुद्धिमान श्रेष्ठ, डा. अनिल भट्टराईलगायतको उपस्थिति रहेको थियो ।

संस्थाका खोजअनुसन्धान तथा विज्ञान विभागका निर्देशक डा। कौशल किशोर तिवारीले संस्थाको उद्देश्य र भावी योजनाबारे जानकारी दिँदै यस्ता अवार्ड कार्यक्रमलाई प्रत्येक वर्ष थप परिष्कृत र व्यवस्थित बनाउँदै लैजाने बताए । सोसाइटी अफ नेप्लिज हेल्थकेयर प्रोफेसनल्स इन युरोपले नेपालका स्वास्थ्य तथा शिक्षाको क्षेत्रमा निरन्तर सहयोग गर्दै आइरहेको छ ।