काठमाडौं – प्यारापिट राख्ने र फ्लड लाइट जडान गरेपछि सरकारले कीर्तिपुरस्थित त्रिभुव विश्वविद्यालय अन्तर्राष्ट्रिय क्रिकेट रंगशाला क्यानलाई हस्तान्तरण गरेको छ ।

सहरी विकास मन्त्रालय अन्तर्गतको संघीय सचिवालय निर्माण तथा व्यवस्थापन कार्यालयले पहिलो चरणमा निर्माण गरिएको प्यारापिट र फ्लडलाइट सरकारले क्यानलाई हस्तान्तरण गरेको हो ।

हस्तान्तरण कार्यक्रममा सरकारका तर्फबाट सहरी विकासमन्त्री कुलमान घिसिङ पुगेका थिए । आइतबार साँझ भएको हस्तान्तरण कार्यक्रममा क्यानका तर्फबाट पदाधिकारी उपस्थित भएका थिए ।

अब यही मैदानमा सोमबारदेखि नेपाल प्रिमियर लिगका खेलहरु हुनेछन् । उद्घाटन खेलमा साबिक विजेता जनकपुर बोल्ट्स र काठमाडौं गोर्खाजले प्रतिस्पर्धा गर्नेछन् ।

एनपीएलका अधिकांश खेल फ्लडलाइटमा हुने क्यानले तालिका सार्वजनिक गरेको छ ।