काठमाडौं– व्यवसायी दुर्गा प्रसाईँको समर्थनमा नागरिक बचाउ दल दर्ताका लागि निर्वाचन आयोगमा सनाखत गरिएको छ ।

यसअघि नै दर्ताका लागि निवेदन दिएको सो पार्टीका नेताहरू आइतबार आयोग पुगेर सनाखत गरेका हुन् । प्रसाईँले आफ्नो नेतृत्वमा राष्ट्र, राष्ट्रियता, धर्म, संस्कृति र नागरिक बचाउ महाअभियान चलाउँदै आएका छन्, तर नागरिक बचाउ दलको सभापतिमा भने नागरिक बचाउ महाअभियानका प्रवक्ता माधव खतिवडालाई तोकिएको छ ।

निर्वाचन आयोगमा सनाखत गरेपछि नागरिक बचाउ दलका सभापति माधव खतिवडाले कार्तिक २३ गते दल दर्ताको निवेदन दिएकोमा आइतबार सनाखत गरिएको जानकारी दिए ।

उनले अहिले धेरै पार्टी दर्ता भए पनि अन्य पार्टीभन्दा आफ्नो दल अलग रहेको दाबी गरे । जनताका आधारभूत एजेन्डालाई लिएर निर्वाचनमा सहभागी हुने उनले बताए ।  

उनले हाल पार्टीको २९ जना प्रारम्भिक समिति गठन गरिएको जानकारी दिए ।