काठमाडौं – पूर्वप्रधानमन्त्री डा. बाबुराम भट्टराईले अहिले देश इतिहासकै सबैभन्दा अन्योलको अवस्थामा रहेको भन्दै सबैले अत्मसमीक्षा गरेर अगाडि बढ्नुपर्ने बताएका छन् ।

अहिलेको परिस्थितिमा सबैले गम्भीर आत्म-समीक्षा नगरे इतिहासले कसैलाई क्षमा नदिने उनको भनाइ छ । सामाजिक सञ्जालमा सक्रिय बाबुरामले फेसबुकमा लेखेका छन्, ‘सबैले गम्भीर आत्म-समीक्षा गरौं, नत्र इतिहासले कसैलाई क्षमा गर्नेछैन ।’

घरमा आगो लागेको बेला को ठूलो कोठामा सुत्ने र कसले ठुलो भाग खाने भनेर झगडा गर्ने समय यो नभएको उनले प्रष्ट पारेका छन् । बाबुरामले आगो निभाउने र नयाँ घर बनाउने संकल्प गर्नुपर्नेमा जोड दिएका छन् ।

‘नेपाल र नेपाली राष्ट्र, राज्य, समाज, अर्थतन्त्र, लोकतन्त्र, सुरक्षा, संस्कृति, मनोवल यतिवेला सम्भवतः इतिहासमै सबभन्दा कमजोर, अस्थिर र अन्योलको अवस्थामा छ’, बाबुरामले लेखेका छन्, ‘घरमा आगो लागेको बेला को ठूलो कोठामा सुत्ने, कसले ठूलो भाग खाने भनेर झगडा, आरोप-प्रत्यारोप गर्ने बेला यो हैन। बरू सबै मिलेर आगो निभाउने र नयाँ अझै सुन्दर घर बनाउने संकल्प गर्ने बेला हो।’