काठमाडौं । नेकपा एमालेका नेता राजिब पहारीले पार्टीका सबै कमिटीमा युवाहरुलाई समेट्नु पर्ने बताएका छन् । एमालेको जारी दशौँ केन्द्रीय कमिटी बैठकको दोस्रो दिन बिहीबार पार्टीका केन्द्रीय सदस्य पहारीले युवा वर्गहरूलाई विशेष तरिकाले पार्टीका सबै कमिटीमा समेट्नु पर्ने आवाज उठाएका हुन् ।

उनले अध्यक्ष केपी शर्मा ओलीकै पक्षमा नै बोल्दै अहिले नेतृत्व परिवर्तनको बहस सान्दर्भिक नहुने बताए । पहारीले भदौ २३ र २४ गतेको जेनजी आन्दोलनपछि अध्यक्ष ओली नेतृत्वको सरकार ढलेको अवस्थामा युवा पुस्तालाई समेटेर ४० प्रतिशत पार्टीका कमिटीमा राख्नु पर्नेमा जोड दिए ।

‘नेतृत्व परिवर्तन अहिलेको बहसको विषय हुनु हुँदैन। विधिसम्मत प्रतिस्पर्धा गर्ने थलो पार्टी महाधिवेशन हो, जो मिति प्रस्ताव नै भइसकेको छ’, उनले भनेका छन्, ‘सम्पूर्ण आन्तरिक समस्याको समाधानको थलो हामीले त्यसैलाई मान्नु पर्दछ ।’