काठमाडौं- नेकपा एमालेका केन्द्रीय सदस्य झपट रावलले पूर्वराष्ट्रपति विद्यादेवी भण्डारीको सदस्यता नवीकरण नगर्ने निर्णय र पूर्वउपाध्यक्ष डा. भीम रावलमाथिको कारबाही फिर्ता हुनुपर्ने बताएका छन् ।

बुधबारदेखि ललितपुरमा जारी १० औँ केन्द्रीय कमिटी बैठकमा बिहीबार बोल्दै उनले भण्डारी र रावलसहित सबै नेताको कारबाही फिर्ता हुनुपर्ने बताएका हुन् ।

‘विद्या भण्डारी र भीम रावल लगायत सबै नेताहरूको कारबाही फिर्ता हुनुपर्छ’, उनले भने, ‘नेतृत्व हस्तान्तरण प्रक्रियालाई सहज रूपमा लिनु पर्छ । गत भदौ २२ गते भन्दा अघिको र पछिको शक्ति सन्तुलन र सम्बन्धमा ब्यापक फेरबदल भएको कुरा पार्टी नेतृत्वले बुझ्नुपर्छ ।’

उनले यो बैठकमा सहभागीहरू जेन-जी आन्दोलनका क्रममा सबै भागेर लुकेको बताए । ‘हामी सबै भागेर र लुकेकाहरूको भेला हो यो, हामी यथार्थपरक बनौँ’, उनले भने, ‘देश अहिले गम्भीर संकटमा छ, संविधान मुर्छित भएको छ, लोकतन्त्र घाइते छ । कम्युनिष्ट आन्दोलन पनि बिघटनको मोडमा छ । घनघोर षडयन्त्र र आकर्मण्यताको सम्भावना टरेको छैन ।’

उनले अहिले नेपाली जनता एकातिर र एमाले अर्कोतिर हिँडिरहेको अवस्थाको पनि विस्तारमा ब्याख्या गरे । रावलले २०८१ असार १७ गते नेपाली कांग्रेस र नेकपा एमालेबीच भएको ७ ब बुँदे सहमति कार्यान्वयन नभएकोमा पनि प्रश्न उठाए ।

‘हाम्रै नेतृत्वको सरकार बनाउनका लागि सात बुँदे सहमति भएको थियो’, उनले भने, ‘गठबन्धन सरकार बनाउनुअघि भएको उक्त ७ बुँदे काग्रेस-एमाले सम्झौता १४ महिना सम्म किन लागु भएन ?’