काठमाडौं – वरिष्ठ अधिवक्ता दिनेश त्रिपाठीले आफूमाथि आक्रमण गर्ने राष्ट्रिय स्वतन्त्र पार्टीका कार्यकर्तालाई क्षमा दिएका छन् ।

उनले स्वर्णलक्ष्मी सहकारीका पीडितको पक्षबाट बहस गरेका थिए । रास्वपाका सभापति रवि लामिछानेमाथिको थुनछेक बहस सकिएर आदेश आउने क्रममा काठमाण्डौ जिल्ला अदातल गेटमा माघ ३ गते उनीमाथि आक्रमण भएको थियो ।

थुनछेक बहस सकाएर निस्कने क्रममा अदालत परिसरमा जम्मा भएका समर्थकहरूले अधिवक्ता त्रिपाठीमाथि आक्रमणको प्रयास गरेका थिए ।

खबरहबसँग कुरा गर्दै उनले भने, ‘म माथि संघातिक आक्रमण गर्ने प्रतिवादीहरू अरुबाट संचालित एव परिचालित पात्रहरू हुन् । प्रतिवादीहरू दिग्भ्रमित पारिएका व्यक्तिहरू हुन् । साथै, आफ्नो विवेक शक्ति गुमाएर आफ्नो नागरिक कर्तव्य समेत बिर्सिएका व्यक्तिहरू भएकाले माफ गर्दिए ।’

त्रिपाठीले माफि दिएपछि एक महिलासहित चार जना प्रतिवादीहरू बुधबार आज काठमाण्डौ जिल्ला अदालतबाट सफाई पाएका छन् ।