काठमाडौं– नेपाली कांग्रेसका सभापति शेर बहादुर देउवाले देशभित्र गुणस्तरीय शिक्षाको अवसर प्रदान गर्नु अहिलेको चुनौती रहेको बताएका छन् ।  

नेपाल सामुदायिक विद्यालय कर्मचारी संघले बुधबार काठमाडौंमा आयोजना गरेको कार्यक्रममा सभापति देउवाले हिजोको चुनौती साक्षरता रहेको भन्दै आजको चुनौती देशभित्र गुणस्तरीय शिक्षाको अवसर प्रदान गर्नु रहेको बताएका हुन् । 

उनले सरकार, सबै राजनीतिक दल र सरोकारवालालाई शिक्षाको विकासका लागि एकजुट भएर लाग्न अनुरोध गरे ।

सामुदायिक विद्यालयहरूले सेवामुखी भई मुलुकको शिक्षा क्षेत्रको विकासमा महत्त्वपूर्ण योगदान दिँदै आएको उनले बताए । सभापति देउवाले सामुदायिक विद्यालयको शिक्षाको गुणस्तरको वृद्धिका साथै सुविधा पनि विस्तार गर्नुपर्ने खाँचो रहेको धारणा राखे ।  

उनले समृद्धिको आधारशिला जीवन उपयोगी शिक्षा रहेकाले व्यवसायी शिक्षा प्रदान गर्न सरकारबाट समुचित र न्यायोचित पहल हुनुपर्ने खाँचो देखिएको बताए ।