काठमाडौं– राष्ट्रिय प्रजातन्त्र पार्टी (राप्रपा)का महामन्त्री एवं प्रतिनिधिसभा सांसद धवल शमशेर राणाको बयान सुरु भएको छ ।

राणा सोमबार काठमाडौं जिल्ला अदालतमा उपस्थित भएसँगै अदालतका न्यायाधीश शिवप्रसाद खनालको इजलासमा बयान सुरु भएको हो ।

राणाविरुद्ध गत चैत १५ गते तीनकुनेमा भएको घटनालाई लिएर राज्य विरुद्धको कसुरसहित ४ वटा मुद्दामा अभियोजन गरिएको छ । उनमाथि राज्य विरुद्धको कसुर, आपराधिक उपद्रव, सङ्गठित अपराध र एकीकृत कसुरमा सजायको मागदाबी गरिएको छ ।

प्रहरीको अनुसन्धानपछि राणा उपचार प्रयोजनका लागि हाजिरी जमानीमा रिहा भएका भए थिए । तर उनी लामो समय सम्पर्कविहीन भइ सोमबार बिहान अदालतमा हाजिर भएका हुन् । राणाको बयान सकिएपछि थुनछेक बहस हुनेछ । 

यता, बन्दीप्रत्यक्षीकरण निवेदनमार्फत रिहा भएका राप्रपाका वरिष्ठ उपाध्यक्ष रविन्द्र मिश्र भने अझै सम्पर्कविहीन छन् । उनी पनि हाजिरी जमानीमा छुटेका थिए ।